القلب مغرم

ما أدري زعل وإلاّ تغلي أو عناد
عطني مبرّر واحدٍ للغيابي

قلبي على همساتك العذبه اعتاد
أشعر بنفسي معك فوق السحابي

وش ياك بدلّت التواصل بالأبعاد
وين الوعد بإنّك تخفّف مصابي

وعدتني بتخلّي أيامي أعياد
وأشوف وعدك صار مثل السرابي

القلب مغرم بك ولك صار ودّاد
شوفك ينسّيني عناي وعذابي

الحب لك يزداد والشوق يزداد
تعال يا زهرة صباي وشبابي

ارجع يا روحي وخلّنا نعيش بأسعاد
هذي سطوري وانت عطني جوابي

كتبتها في وقت ما لذّ لي رقاد
وأرسلتها لك يا رفيع الجنابي